Ikki gott í væntu fyri nýrasjúklingar norðanfyri
Eftir at Nýrafelagið í opnum brævi hevði heitt á landsins myndugleikar um at bera so í bandi, at dialysuviðgerð eisini kann fáast á Klaksvíkar Sjúkrahúsi, setti Elsebeth M. Gunnleygsdóttur ein fyrispurning um málið til landsstýriskvinnuna í heilsumálum, Eyðdis H. Niclasen. Svarið er nú komið, men tað sigur, at nýrasjúklingar norðanfyri ikki hava nakað at vera optimistiskir um.
Í spurninginum spurdi Elsebeth M. Gunnleygsdóttur um íløgukostnað, rakstrarkostnað og neyðug tól, men fyrst og fremst um Landsstýrið í heila tikið var sinnað at ganga Nýrafelagnum á møti.
Svarið er, at tað fer at kosta samanlagt millum 3,6 og 5,2 milliónir um árið, og at neyðuga útgerðin fevnir um 3 dialysustólar, 4 dialysumaskinur, eina vatnreinsiskipan og so útreiðslur til HVS, elektrisitet og innrætting. Av manning krevjast 4 sjúkrarøktarfrøðingar og ein lækni á staðnum, umframt at ein nýralækni kann røkkast.
Nýrafelagið vísti annars á, at ein dialysusjúklingur í Klaksvík ofta brúkar 22 tímar um vikuna, svarandi til meira enn eitt hálvtíðarstarv, til at fáa dialysuviðgerð í Tórshavn. Av hesum 22 tímunum fara 10 tímar, ella knapt helvtin, til koyring, meðan viðgerðin sjálv tekur 12 tímar um vikuna. Føroyska Nýrafelagið hevur verið í sambandi við danska Nýrafelagið, ið sigur, at ”hæmodialyse tæt på eget hjem ikke bare reducerer de lange transporttider. Erfaringer viser, at nyrepatienter med adgang til flere og mere dialyse opnår langt større livskvalitet”.
Leggjast kann afturat, at nýrasjúklingar í Suðuroy í 2024 fingu dialysuviðgerð í nærumhvørvinum, og nú tilboðið hevur virkað í yvir 2 ár, hevur onki verið at frætta um nakra neiliga avleiðing.
Spurningur og svar kunnu lesast í fullum líki her: https://www.logting.fo/mal/mal/?id=11523