Spælið kemur út 19. november í ár til PlayStation 5 og Xbox Series X/S, og alt bendir á, at útgávudagurin stendur við, hóast spælið áður er útsett tvær ferðir.

Í ár eru 13 ár liðin síðani GTA V kom út. Síðani tá er spælið selt í hundraðtals milliónum eintøkum og liggur á øðrum plássi, sum mest seljandi spæl nakrantíð. Tí hevur bíðitíðin eftir GTA VI verið serliga long hjá teimum mongu fjepparunum.

Spælið skuldi upprunaliga koma út á heysti í 2025, men er síðani blivið útsett tvær ferðir.

Rockstar hevur í dag eisini almannakunngjørt permuna til spælið. Her síggjast høvuðspersónarnir Lucia og Jason saman við skjóttgangandi bilum, tyrlum, flamingoum og krokodillum. Spælið fer fram í uppspunna statinum Leonida, sum hevur sín íblástur frá Florida.

Enn er prísurin á spælinum ikki almannakunngjørdur, men nógv vænta, at Rockstar fer at avdúka hann í sambandi við undanbíleggingina í komandi viku.

Eitt er tó greitt. GTA VI er eitt mest eftirspurda spælið nakrantíð, og nú eru bert fimm mánaðir eftir, til fjepparar loksins sleppa út á gøturnar í Vice City aftur.