Nevið Reyða og Argjabáturin hava vunnið tríggjar róðrar í part. Tískil verður ólavsøku-vinnarin eisini FM-vinnari. Tí fær tað ikki verið meir spennandi millum hesar báðar bátarnar, sum hava verið so javnir í alt summar. Argjabáturin hevur heimasjógv, men bátarnir úr Klaksvík hava tað við sum oftast at standa seg væl á ólavsøku. Tað er at vóna fyri norðoyingar, at tað rákið stendur við hesaferð.

Hjá tveimum av hinum bátunum hjá KRF stendur eisini nógv uppá spæl. Fípan Fagra við dreingjum í barnaróðrinum kann við sigri gera slætt borð fyri hetta kappingarárið við at vinna allar róðrarnar. Karin við dreingjum stríðist fyri at vinna bronsu-heiðursmerki. Karin skal enda frammanfyri Drekan á ólavsøku fyri at tryggja sær bronsuna fyri árið. Karin hevur vunnið ein róður hetta kappingarárið.