Men aftur til veðrið, sum tað er í løtuni, nú klokkan er 0915, og tað er ólavsøkuaftan.

Lítil vindur allastaðni í Føroyum (eg hyggi eftir www.vedrid.fo). Tað er klárt og gott veður í norði, suðuri, eysti og vestri. Klárur himmal við sólskini. Onkrasteðs skýkloddar. 

Ættin er landnyrðingur. Hitin er ikki at kimsa at í morgun. Mátistøðin á Eiði sigur frá 21,6 stigum, og hinumegin sundið, við Tjørnuvíkarvegin, eru 22 stig. Tað er ikki vanligt at síggja í Føroyum.

Soleiðis fer veðrið at vera allan dag. Turt og sól, onkrasteðs sólglottar.

Hann lág av landsynningi í morgun. Klokkan 8 vóru 20 stig inni í Dølum, men bert tveir tímar seinni var hitin komin niður í 17 stig.

Vindferðin fer eitt lítíð sindur upp seinnapartin - upp í 3 til 8 m/s fyri alt landið. Onkrasteðs verður kanska támut á landnyrðingi, sum tað líður út á dagin. 

Landnyrðingurin fer at liggja í kvøld, í nátt og fyrrapartin í morgin. Á middegi í morgin - ella nakrar tímar út á seinnapartin - fer ættin niður í eystan, og har fer hann at liggja í nakrar dagar.

Sum sagt, einki brúgavlag við regni í dag ella í kvøld. Um midnáttarleitið í kvøld fer ætlandi eitt lítið regnumráði fram við Føroyum. Tað sær ikki út til at hava nógv uppá seg, men veðurstovur í norðurlondum er ymsar á máli, hvussu nógv fer at koma niður úr tí. Onkur sigur lítið og einki; onnur veðurstova sigur frá eitt sindur meiri enn tað.

Hvussu er ella ikki, so er tað farið nakað út á náttina, og eftir tað er einki regnumráði, sum ætlar at leggja leiðina framvið fyrr enn týskvøldið.

So heilt stutt, so er veðrið í dag landnyrðingur - um 3 til 8 m/s. Turt við sól og skýkloddar. Í støðum támut, tað velst um, hvussu ættin er á staðnum. Hitin í dag ímillum 13 til 18 stig - í støðum oman fyri 20 stig.

Í morgin landnyrðingur, 3 til 8 m/s. Seinnapartin eystan. Løtur við regni um náttina, men eftir tað turt restina av degnum. Loftið í morgin fer kring landið at vera eitt bland av sól, skýggjað og támut. Júst soleiðis, sum tað eigur, tá ið ættin er eystan. Hitin í morgin fer at liggja um 12 til 18 stig.

Her á veðurredaktiónini á Norðlýsinum verður ynskt øllum eina góða ólavsøku.