Herfyri hevði Norðlýsið eina upplýsandi oddagrein, har greitt varð frá, hvussu hendan landsstýrissamgongan hevur brúkt mestsum hvørja krónu, sum Landsverk umsitur, í og kring høvuðsstaðin, meðan restin av landinum fær alsamt minni og minni av teimum skattakrónum, sum hesi øki rinda inn í landskassan.

Í greinini varð dokumenterað við almennum roknskapartølum, at í hesum valskeiðnum hevur eittans øki fingið sera nógv í mun til fólkatalið, meðan allar hinar fimm sýslurnar hava fingið heilt lítið í mun til síni fólkatøl.

Niðanfyri er talva, sum vísir nýtsluna hjá Landsverki í 2017 og 2018, lutaðar út á landspartar, har tað greitt kemur fram, hvussu stórur tann landafrøðiligi ójavnin er blivin undir hesi landsstýrissamgonguni millum Javnaðarflokkin, Tjóðveldi og Framsókn.

Eg kann ikki annað enn taka fult undir við blaðstjóranum á Norðlýsinum, tá hann staðfestir, at “her er tendensurin eins óhugnaligur, sum hann er greiður”, og at “taka vit útreiðslurnar hjá Landsverki, er landafrøðiliga gjógvin uppaftur størri enn millum rík og fátæk í tí føroyska samfelagnum”.

Tá vit staðfesta eitt so órættvíst býti millum landspartarnar í Føroyum, er tað sera ófrættakent at hoyra Heðin Mortensen, løgtingsmann hjá Javnaðarflokkinum, koma við eini so arrogantari útsøgn sum, at “bara Havnin hevur tað gott, so hava allar Føroyar tað gott”, og somu kenslur fær ein av at hoyra Poul Michelsen, landsstýrismann hjá Framsókn, tosa um, at nú skulu vit halda aftur í útreiðslunum hjá landskassanum og hjá kommununum kring landið.

Her krevur ein nýggj manning at koma framat at stýra føroysku skútuni aftur á beint, soleiðis at vit aftur kunnu fáa einar javnari Føroyar – eisini landafrøðiliga.

Fólkaflokkurin hevur viljan og hann hevur eisini neyðugu styrkina til at fremja hesa alneyðugu kósbroyting, soleiðis at Føroyar aftur verður eitt land – og ikki bara ein býur, so sum undir hesi landsstýrissamgonguni.

Eisini á hesum øki vil eg brúka mínar royndir í politikki til at hjálpa og gera mun fyri allar partar av landinum.

Jákup Mikkelsen

Løgtingsmaður og løgtingsvalevni fyri Fólkaflokkin