Herfyri vendi EUC-Syd í Sønderborg sær til TSK við fyrispurningi um áhugi var at fáa eina serliga gávu heim aftur til Klaksvíkar.  Talan eru eitt sett av grindareiðskapi, sum er latin av P/f JFK til skúlaleiðaran í Sønderborg, Kristen Toftdahl Møller(1893-1964). Frammanundan var Toftdahl Møller sonevndur statskonsulentur og hevði stóra ávirkan á teknisku skúlarnar í kongaríkinum.

Tekniski Skúlin í Klaksvík er stovnaður í 1935. Fyrstu mongu árini var Jóhan Rasmussen ella Jóhan í Grótinum fyristøðumaður á TSK. Í hansara tíð var nógv orka løgd í at útvega hóskandi umstøður til undirvísingina av handverkarum og maskinistum. Hetta eydnaðist umsíðir fyrst í fimmti árunum. Sum tøkk fyri samstarvið hevur Kristen Toftdahl Møller fingið gávuna um hetta mundi.

Mánamorgunin komu Tommy Mikkelsen og Svend Dyhr við Norønnu beinleiðis til Klaksvíkar við forkunnugu útgerðini. Teir eru báðir fyrrverandi starvsmenn á EUC, sum nú taka sær av søguliga tilfarinum á skúlanum.

Til móttøkuna var Poul Havn, sonur Jóhan í Grótinum, hjástaddur saman við Frimodt Rasmussen, stýrisformanni og Rúna Heinesen, skúlastjóra.