Mjølnir vann 3-0 móti ÍF
Mjølnir menninir greiddu sína skyldu á heimavølli, tá teir vunnu 3-0 móti ÍF
Greipuvinnararnir frá í fjør eru byrjaðir væl uppá kappingarárið. Teir vunnu ígjárkvøldi sín næsta dyst av tveimum. Hesaferð vitjaðu menninir úr ÍF. Tvey tey fyrstu settini vann Mjølnir rímuliga trygt, hóast teir vóru aftanfyri 11-5 í fyrsta setti. Triðja settið gjørdist meira javnt og Mjølnir skuldu heilt upp í 29 bóltar fyri at avgerða dystin.
Venjarin Phil Freere ger nógv burturúr at fáa ungar leikarar inn á liðið. Seinasta dyst fingu tveir blaðungir menn teirra fyrsta dyst á besta liðnum og í dag fekk aftur ein kjansin. Jóan Petur Samson kom inn eitt stutt skifti og gjørdi tað gott.
Trygvi Hansen sum gjørdist ársins miðjuleikari í fjør, hevur í eina tíð verið darvaður av pínu í hondini og í vikuni hevur hann fingið staðfest at hondin er brotna. Hann hevur ikki leikt enn fyri Mjølnir í ár, og tað fara at ganga nakrar vikur til hann aftur kann spæla.
Settúrslitini vórðu: 25-20, 25-19 og 29-27
Næsti dystur hjá Mjølnir monnunum er leygardagin í Sørvági tá SÍ bíðar.