Tað er ikki hissini herverk, ið er gjørt á bilar í nátt. Jógvan Johannesen, vegaformaður hjá Klaksvíkar Kommunu sigur, at herverksmenn hava skotið, helst við sterkum luftbyrsum, rútarnar inn á umleið 25 bilum og gravkúm hjá Klaksvíkar Kommunu. Harafturat hjá eini 25 bilum uttanfyri verkstaðin hjá kommununi á Bumshamri.

Hetta fer at tarna okkum nógv komandi dagarnar, tí hetta eru amboð, ið brúkt verða hvønn dag. Um nakar veit um hvør hevur gjørt hetta, so er at siga politinum frá.

Í Atlantis hevur eisini verið innbrot í nátt. Ein stórur rútur er brotin og fólk hava verið inni og hugna sær og etið úr Kioskini, sigur Beinta Gregersen, leiðari á Atlantis, men annað herverk er ikki gjørt á ognirnar hjá Atlantis.