Støðan í fiskivinnuni hjá feskfiskavinnuni í Føroyum er ikki góð. Flakavirkini sleppa ikki av við fiskin, tí eingin marknaður er uttanlands. Spania er ein av stóru marknaðunum fyri saltfisk og Spania er sera hart rakt av koronasjúkuni. Hetta rakar útróðrarflotan og línuflotan sera hart, tí hesir hava feskan ísaðan fisk.

Úróðrarbátarnir hava lagt

Oddmar Niclasen er skipari og eigari av Bragd, sum er ein av størru útróðrarbátunum í Klaksvík, sum hevur róð út í nógv ár.

- Vit eru givnir at rógva út, tí prísurin er so mikið vánaligur, at tað loysir seg ikki at fara avstað. Hjá flestu útróðrarbátunum hevur tað gingið væl síðani seinna part av 2018, og tað ger, at vit kunnu yvirliva nakrar mánaðar nú. Høvdu vit ikki havt so góðan fiskiskap hetta hálvtannað árið, so høvdu vit nokk ikki yvirlivað at ligið stilt í fleiri mánaðir. Verður manningin ikki uppsøgd, so er hon bara partur av minstulønini, sum er 19.000 kr. um mánaðin, um báturin leggur stilt ein heilan mánaða. Vit vita ikki hvussu leingi hetta varðar, men fyribils er Bragd lagdur, um ikki miðalprísurin hækkar uppá eini 11-13 krónur, sigur Oddmar Niclasen, sum heldur, at støðan í fiskivinnuni er heilt gloymd í almennu umrøðuni fyri tíðina.

Hann sigur, at Bragd var onkran túr fyrstu dagarnar eftir, at strongu tiltøkini blivu sett í verk. Tá var skipanin í skúrinum, har stamparnir verða engdir, at fýra egnarar vóru við stórari frástøðu, og at hurðin var stongd, so at fólk ikki kom inn í skúrin, sum er vanligt á Stongunum.