Tað er umhvørvisátakið Slóða Fyri, ið hevur staðið handan hesa royndarverkætlan.

“Vit vilja vil við hesum framtaksanda skapa eitt stað, har bóndir,útróðrarfólk og onnur virkisfús fólk í samfelagnum, sum brenna fyri lokalari framleiðslu, hava møguleika at selja føroyskar matvørur”, siga fyriskipararnir Gunnhild Dahl Niclasen og Annika Steintórsdóttir Biskopstø. Endamálið er at varpa ljós á mat í nærumhvørvinum og teir umhvørvisligu fyrimunirnir, sum standast av at keypa lokalt, og tær halda, at júst hendan tíðin er eitt gylt høvið at sjóseta eina slíka ætlan, sum annars hevur verið eftirspurd í langa tíð.

Lokalt framleiddur matur gagnar umhvørvinum, tí maturin hevur ikki ferðast langa leið. Somuleiðis vísir tað seg, at vit virða matin meira, tá vit vita, hvaðani maturin kemur, og oyðsla minni. Eisini verða vit meira sjálvbjargin av at hava lokala framleiðslu. Alt hetta er í samsvari við heimsmál nummar 12, sum snýr seg um ábyrgdarfulla nýtslu og framleiðslu.

Ætlanin er, at smátturnar eru opnar hvønn leygardag frá kl 10.00-13.00. Møguleiki er eisini at lata smátturnar upp aðrar dagar, til eitt nú fríska fiskasølu, um áhugi er.

Kundi tú hugsað tær at selt?

Áhugaði kunnu venda sær til Gunnhild Dahl Niclasen á telefon 282878 ella Anniku S. Biskopstø á telefon 219011. Til ber at selja føroyskan, burðardyggan og nýfiskaðan ella framleiddan mat.

Fylgið okkum á facebook vanganum Slóða Fyri.