Fylg makrelkanningunum 2020
Árligu makrelkanningarnar eru nú byrjaðar. Hetta er ein stór altjóða felagskanning, sum miðar móti at lýsa vistskipanina við serligum denti á makrel í Norðurhøvum í juli-mánaði. Talan er um eina yvirlitstroling eftir makreli, umframt ekkókanningar av sild og svartkjafti. Umhvørviskanningar verða eisini gjørdar at máta hita, salt og nøgdina av djóraæti í sjónum.
Høvuðsmálið er at fáa tilvega vísital fyri makrelstovnin, í sambandi við stovnsmetingarnar seinni í summar.
Seks skip luttaka í kanningunum. Íslendska rannsóknarskipið Árni Friðriksson og Tróndur í Gøtu byrjaðu mikudagin 1. Juli. Komandi dagarnar byrja trý skipa afturat, eitt í Norðsjónum og tvey í Norskahavinum. Sætta skipið fer at gera kanningar í grønlendskum øki seinni í mánaðinum.
Til ber at síggja hvar skipini eru stødd, og hvussu langt tey eru komin við kanningunum. Leinkja til kort við kanningargongdini liggur á forsíðuni hjá Havstovuni (Makrelkanningar 2020) og kann síggjast her.