Mistøk kostaðu dýrt í Dublin
KÍ spældi ein góðan seinna hálvleik, men tað var ikki nokk, tí persónligu mistøkini vóru ov mong, og tí tapti liðið 3-1.
Í fyrra hálvleiki var Dundalk betra liðið. Serliga seinnu helvt av hálvleikinum lá KÍ langt afturi á vøllinum og eftir trýst eina løtu, so kom Dundalk á odda 1-0. Stutt eftir hálvleik kom Dundalk á odda 2-0, tá KÍ-leikarar ikki fingu ruddað eitt lítið vandamikið hornaspark burtur. KÍ minkaði um munin við frálíkum máli frá Ole Erik Midtskogen. KÍ fekk sjálvsálit og tað lá eitt 2-2 mál í luftini, men so komu aftur mistøk, ið gjørdu, at Dundalk kom á odda 3-1, og so var avgjørt.
Hyggja vit eftir málunum hjá Dundalk, so vóru tey øll av slagnum, har KÍ-leikarar ikki síggja ov gott út. Dundalk var betra liðið í fyrra hálvleiki, meðan KÍ var betra liðið í seinna hálvleiki. Álopsparturin hjá KÍ var ikki eins neyvur sum hjá heimaliðnum. KÍ er sostatt úti av Europa League kappingarárið 2020, har KÍ sum fyrsta føroyska liðið kom til Play-off dyst.