Úrslitið er, at farið er frá avlopi á nærum hálva milliard í 2019 til stórt hall - sjálvt uttan útreiðslur orsakað av korona.

·      Nú fíggjarlógaruppskotið fyri 2021 er lagt fram er greitt, at leypandi útreiðslur landsins til rakstur eru øktar um 600 milliónir og 12% eftir bert 2 árum - harafturat koma korona-útreiðslurnar, ið hava verið neyðugar - alt ófíggjað.

·      Inntøkur landsins og inntøkurnar hjá kommununum eru samstundis minkaðar munandi við fleiri lógarbroytingum - alt ófíggjað.

·      Serskattaskipanir settar í verk fyri fleiri bólkar - alt ófíggjað.

·      Inntøkur frá tilfeingisgjøldum minkaðar munandi - alt ófíggjað.

·      Útreiðslur til íløgur á fíggjarlógini øktar - samstundis sum íløgur, ið áður sóust á fíggjarlógini verða fluttar út um fíggjarlógina.

·      Fíggjarliga langtíðarhaldførið hjá landinum, og harvið fíggjarliga grundarlagið undir okkara vælferðarsamfelagi, er hartil munandi versnað við fleiri stuttskygdum lógarbroytingum og ófíggjaðum átøkum eitt nú á pensjónsøkinum.

·      Skuld landskassans er økt 1,6 milliard - harav bert ein partur er orsakað av korona.

·      Nú alt tað uppsparda avlopið er brúkt, verður farið eitt stig víðari. Nú mæla samgongufólk til at selja landsins fyritøkur - eitt nú Føroya Tele - fyri at brúka enn meira pening beinanvegin. Hvar endar hetta?

Fleiri ávaringar um skeiva fíggjarpolitikkin

Tað er ikki uttan orsøk, at bæði Vinnuhúsið  og Fíggjarmálaráðið - í tíðindaskrivi og búskaparfrágreiðing - ávara ímóti førda fíggjarpolitikkinum. Búskaparráðið vísir eisini á, at Føroyar - hóast korona - als ikki eru í einum búskaparligum aldudali, og mælir frá, at seta ferð á búskapin.

Landsstýrið ger nógv fyri, at flyta Føroyar burtur frá málinum um ein sjálvberandi búskap - kanska hetta er endamálið?

Søgan endurtekur seg

Á heysti 2011 fingu somu flokkar, sum nú eru í landsstýrinum – Sambandsflokkurin, Fólkaflokkurin og Miðflokkurin (umframt Sjálvstýri) – ábyrgd. Valdu tá, eins og nú, at brenna ljósið í báðum endum. Úrslit landskassans versnaði. Hetta hendi enntá hóast valt varð frá 2012 at inntøkuføra 2-300 milliónir árliga av framtíðar pensjónsskatti. Inntøkur, ið ikki vóru í 2011, og sum koma at mangla seinni.

Á heysti 2015 fingu vit – Tjóðveldi saman við Javnaðarflokkinum og Framsókn –

ábyrgd, og valdu at venda gongdini beinanvegin. Framskrivaða fíggjarlógin fyri 2016 vísti tá stórt hall á -144 mió. kr. Við javnari býti av virðunum við fult fíggjaðum lættum til lág- og miðallønt, við nýggjum inntøkum og varligum útreiðsluvøkstri, eydnaðist at venda stórum halli til avlop. Skuldin minkaði og uppsparingin vaks. Búskaparliga gjørdust vit meira sjálvberandi og sjálvbjargnari.

Á heysti 2019 endurtók søgan frá 2011 seg - tíverri.

Enn ein upprudding fyri framman

Núverandi landsstýri fremur nógv ófíggjað átøk, ið minka inntøkur landsins og økja útreiðslurnar. Úrslitið er hareftir.

Landsstýrið brennur fíggjarliga ljósið í báðum endum.

Ein av høvuðsuppgávunum hjá einum komandi landsstýri verður tí, at at fáa skil aftur á fíggjarpolitikkin og at venda gongdini – einaferð enn.