Illveður um vikuskiftið
Eitt djúpt lágtrýst fer at seta sín dám á veðrið í vikuskiftinum.
Enn er lágtrýstið langt frá Føroyum. Á middegi í dag var tað statt nakað eystan fyri eysturstrondina í USA - einar 2500 fjórðingar frá okkum.
Tað ferðast ímóti okkum og fer ímillum Føroyar og Ísland seint fríggjakvøldið. Tað fer víðari og er væntandi statt yvir Lofoten og Norðurnorra leygarkvøldið.
Mesti vindurin kring lágtrýstið er sunnan fyri miðjuna. Tað er júst hesin parturin av lágtrýstinum, sum fer at leggja seg yvir Føroyar seinnapartin fríggjadagin og verður liggjandi líka til á middegi sunnudagin.
Nýggjastu veðurvánirnar fyri vikuskiftið í sambandi við hetta lágtrýstið eru, at tað fer at regna á middegi fríggjadagin, ættin fer úr suðuri yvir í útsynning-sunnan, og miðalvindurin fyri landið fer at veksa.
Tað fer at slíta í langt út á seinnapartin, og vindurin veksur enn meiri. Á midnátt eru 25 m/s av útsynningi ella útsynningi-suðuri. Hetta sær út til at vera løtan við mesta vindinum hesaferð – also á midnátt fríggjakvøldið og 2-3 tímar fram í leygarnáttina.
Nakrar tímar eftir midnátt minkar miðalvindurin niður í 18 til 23 m/s, ættin fer upp í vestan og fer at liggja har til leygarkvøldið. Tá fer ættin at sníkja seg upp ímóti útnyrðingi. Sama vindferð.
Ikki fyrr enn fram ímóti middegi sunnudagin fer vindurin at minka.