Eitt er tað reint fíggjarliga. Almennir stovnar í Tórshavn, sum húsast til leigu, rinda ein munandi hægri leigukostnað fyri hvønn m², enn teir gera aðrastaðni. Tí skuldi ein trúð, at har máttu óvanliga góð argument fyri kortini at velja Tórshavn sum staðseting av almennum virksemi. Men har kom ikki eitt tað einasta argument. Almennir stovnar tykjast bara detta niður í Tórshavn av sær sjálvum, og uttan nakra fólkaræðisliga viðgerð.

Seinasta valskeið sóu vit eina yvirtøku, ið gjørdist nýstovnaða Familjufyrisitingin. Her var upplagt at lagt Familjufyrisitingina onkrastaðni úti kring landið, men tá var mótargumentið, at talan var ikki um nýggj størv, men fólk sum longu høvdu arbeitt hjá Ríkisumboðnum, og tí var onkursvegna “hevd” fyri at lata størvini halda áfram í Tórshavn.

Men, eisini sama valskeið, fingu vit ein spildurnýggjan almennan stovn, ið eitur Vegleiðingarstovan. Øll størvini har vóru nýggj størv og høvdu tí ongar røtur ella hevd nakrastaðni. Men eisini har bleiv stovnurin lagdur í Tórshavn, uttan nakra sakliga grundgeving, og uttan nakra fólkaræðisliga viðgerð frammanundan.

Hóast tingfólk og landsstýrisfólk í hesi samgonguni í nógv størri mun koma úr útjaðaranum, enn tey gjørdu í síðstu samgongu, so tykist eisini hendan halda áfram við sama automatikki, har bæði nýggir og yvirtiknir almennir stovnar av sær sjálvum verða staðsettir í miðstaðarøkinum. Til dømis var eitt tað fyrsta, sum hendi, tá Eysturoyartunnilin læt upp, at einasta “út-deild” hjá ALS varð niðurløgd og alt virksemið flutt til Havnar.

Veðurforsagnir eru seinastu tíðina fyrst og fremst komnar av Viðareiði. Nú gera vit eina hálva milliardaíløgu í betrað samferðslukervi við nýggjum Tunlum Norður um Fjall, so hví ikki leggja ein almennan stovn norðanfyri eystara tunnilsmunnan? Saklig ynski eru eisini komin úr Vágum um at hava Veðurstovuna har, tætt við flogvøllin. Í øllum førum áttu vit at torað at tikið kjakið, men tað fáa vit ikki – tí avgerð er longu tikin frammanundan um, at Havnin skal hava Veðurstovuna.

Blíva vit við uppá hendan mátan, so verða Føroyar sera fátækar um nøkur ár. Sera mong fólk flyta til Havnar, m.a. tí at Landskassin brúkar næstan allar sínar pengar har. Útjaðarin verður fátækari og fátækari, tí stovnar verða niðurlagdir har og eisini fluttir til Havnar. Fesk dømi eru føðideildirnar og deildin hjá Arbeiðsloysisskipanini í Saltangará.

Gongdin má vendast, skulu Føroyar gerast rættvísar. Hóast vit eru kanska heimsins javnasta land, tá tað kemur til lønarinntøkur, so skríggjar tann geografiski ójavnin til himmals.

Politikarar, gerið tað rætta! Takið fólkaræðisligu diskussióna um, hvar almennir stovnar, nýggir sum yvirtiknir, skulu staðsetast. Verður niðurstøðan, at onkur teirra liggur best í Tórshavn, so er tað í lagi. Men ikki bara leggja alt í Havn av gomlum vana.