Í sambandi við aðalfundin, sum Klaksvíkar Vinnulívsráð hevði ígjár, so varð heitt á Jón Sigurðsson, stjóra á ArtiCon at verða gestarøðari. 

Jón greiddi frá undir heitinum “Frá íverksetara við fáum starvsfólkum til eina kenda nútíðarfyritøku við 2-300 starvsfólkum”. Byggifyritøkan ArtiCon, sum í dag er størsta byggifyritøka í landinum, hevur frá byrjan fyri júst 20 árum síðani sett sær fyri í dygd og trygd við góðum trivnaði at gerast álítandi við hollum samstarvi millum byggiharra og fyritøkuna.

– “Hetta hevur givið úrslit á mongum mótum. Vit hava latið úr hondum hópin av størstu verkætlanum í landinum. Júst í hesum døgum hava vit latið frá okkum “Hvalbiartunnilin” og hava sett á “Tunlar Norður um Fjall” –  umframt havnabyggingar, framleiðslubygningar, íbúðarbyggingar, skúlar - umframt umsitingarbygningar, almennar og privatar.”, sigur stjórin.

Við Norðlýsið sigur Jón Sigurðsson, at hann varð boðin norður at greiða frá um fyritøkuna hjá sær og søguna hjá henni. ArtiCon varð stovnað í 2001, og enn tann dag í dag er fyritøkan í framhaldandi menning. Tað ræður um at lyfta seg upp og taka tey tøkini, sum skulu til, eisini longur niðri í skipanini. Jón sigur, at tað hevur verið ein góð blanding av stórum og smáum verkætlanum, ið hevur gjørt, at fyritøkan hevur havt eina støðuga framgongd.

Í løtuni er ArtiCon í gongd við at gera vegirnar til Tunlar Norður um Fjall, og væntast kann, at borurin verður settur í í august mánað. Tunlarnir væntast lidnir í 2024.