Veðrið um vikuskiftið
Tað verður eitt sindur av hvørjum veðri hetta vikuskiftið.
Eitt lagtrýst fer framvið norðan fyri Føroyar. Tá er høgætt hjá okkum - í dag og morgin. Komið nakað eysturum, er stilli - sunnudagin.
Sunnukvøldið nærkast tað næsta lágtrýstið vestaneftir. Leiðin er eitt sindur longri suðuri enn tey hava gingið í seinastuni, og tí fer suðurætt við lýggjari luft at reka til okkara mánanátt og -morgun.
Men vit byrja í dag, sum vit plaga.
Vindmátarar hjá Veðurstovu Føroya siga lítlum og ongum vindi í morgun, 2 - 4 m/s av útnyrðingi vestri. Turt kring alt landið og sólglottar. Hitalagið liggur um 2 til 4 stig.
Seinnapartin og í kvøld fara ælingar við regni at reka inn yvir Føroyar, og hann fer at mala úr ymsum ættum. Framvegis lítil vindur.
Í nátt fer ættin upp í norðan, fyrrpartin í morgin yvir í landnyrðing ella eystan eina løtu. Seinnapartin fer vindurin at veksa eitt sindur av norði - klokkan 18 eru 5 til 10 m/s. Yvirhøvur turt allan leygardagin, og hitin fer at liggja um 2 til 4 stig.
Sunnunáttina fer ættin at flyta seg vestur um norðan til útnyrðing norðan. Vindurin fer at minka úr á fyrrapartin. Seinnapartin fer hann at mala úr ymsum ættum eina løtu, og vindferðin fer niður í lítið og einki.
Sunnukvøldið er sunnan, og út á mánanáttina fer vindurin at veksa. Yvirhøvur turt sunnudagin, og hitin fer at liggja um 3 til 5 stig.