Uppskot um at uppraðfesta kavaruddingina
Bæði í fjør og við byrjanina av hesum árinum er nógvur kavi komin niður, og hevur hetta tarnað borgarum og vinnulívi í teirra dagliga virksemi.
Okkara dugnaligu og røsku arbeiðsfólk úti á vegnum hava verið ótroyttilig í royndini at grava og salta tað, tey kunnu. Langir dagar og at arbeiða undir slítandi umstøðum ger tað ómøguligt hjá somu fáu arbeiðsfólkum at røkja kavaruddingina út í hvønn krók í kommununi.
Tí mælir minnilutin til, at kavaruddingin verður endurskoðað, og neyðugu raðfestingarnar verða gjørdar, so fólk og vinnulív fáa betri umstøður at virka framyvir.
Í endurskoðanini eigur millum annað hetta at vera tikið við:
- Ruddast má soleiðis, at bussarnir fyrst og fremst sleppa at koyra, so flest allir borgarar – herímillum skúlabørn og eldri – kunnu koma trygt aftur og fram
- At upplæra fleiri starvsfólk, sum kunnu vera við í kavaruddingartoyminum - At fáa røttu maskinur til vega – bæði til vegir og gongubreytir
- At kanna eftir, um onnur arbeiðsfólk, sum ikki arbeiða dagliga hjá kommununi, kunnu vera við í arbeiðinum at rudda, tá ið tað er átrokandi
Sjálvandi eru tað eisini onnur viðurskifti, ið skulu vera við í endurskoðanini, so sum hvílitíð og útgerð v.m.
Vónandi kann hetta takast upp skjótast gjørligt, so vit ikki aftur enda í líknandi støðu seinni í ár.
Jógvan Skorheim Signhild V. Johannesen Tummas Lervig