Átta tons glastrevjabáturin Dalsenni hevur gjørt ein sera góðan túr í morgun. Ólavur Nybo, sum er eigari av bátinum, segði, tá vit ringdu, at Dalsenni hevði verið einar tveir fjórðingar úr landi norðanfyri, vestanfyri Kallin. Teir settu 48 stampar og komu aftur við 11.000 pundum. Umleið 6.000 pund vóru toskur og restin hýsa og annar fiskur. Orsøkin til at eg tosaði við Ólav var, at sonur hansara Jóhannus Nybo, sum drívir bátin helst var inntørnaður nú teir høvdu avreitt.

Annars hevði Brandur 7.600 pund í dag, Stakkavík, sum eisini er ein glastrevjabátur hevði 9.800 pund, Norðsøki 10.600 og Líðhamar 10.600 pund, so samanlagt kann sigast at fiskiskapurin hevur verið góður í nátt.

Eg spurdi inn til rogn tá eg var á støð hjá Líðhamri, men sagt var, at so lítið var í toskinum at sera lítið bleiv tikið.