Fyritøkur mugu gjarna geva Landssjúkrahúsinum gávur
Tvær reisur seinastu 25 árini hevur Landssjúkrahúsið fingið MR-skannara í gávu frá Tryggingarfelagnum Føroyar. At fyritøkur soleiðis geva sjúkrahúsum gávur, er tí onki nýtt. Tað einasta nýggja er, at tað fær ilt í ávísar miðstaðar-politikarar, at vinnan nú letur Klaksvíkar Sjúkrahúsi sín fyrsta MR-skannara og ikki Landssjúkrahúsinum sín triðja.
Tað, sum nú hendir á Klaksvíkar Sjúkrahúsi, at privatar fyritøkur donera sjúkrahúsinum eina gávu, er komið fyri fleiri ferðir fyrr. Landssjúkrahúsið í Havn hevur eisini fingið MR-skannara í gávu frá fyritøku, uttan at nakar politikari norðanífrá hevur mælt eitt einasta ilt orð um tað.
Til dømis læt Tryggingarfelagið Føroyar í 1998 Landssjúkrahúsinum ein MR-skannara, virði 7 milliónir. Leinki til grein um tað er niðanfyri.
Tað var eisini Tryggingarfelagið Føroyar, sum í sambandi við 70-ára stovningardag sín í 2010 læt Landssjúkrahúsinum enn ein MR-skannara, virði 10 milliónir. Heilsumálaráðharrin tá var núverandi løgmaður, sum enntá skrivaði eina stóra almenna tøkk á heimasíðuna hjá sínum aðalráði. Leinki til hana er eisini niðanfyri.
Tað er tí margháttligt at hoyra Ruth Vang og Margit Stórá gera tað til, at vinnulívið nærmast tekur politikararnar av ræði við at geva Klaksvíkar Sjúkrahúsi nakað. Heldur eru tað tær báðar, ið vilja taka vinnulívið av ræði við at siga, at vinnan einans kann lata sjúkrahúsinum í Havn gávur.
https://www.in.fo/news-detail/landssj-krah-si-fingi-st-rfingna-g-vu
https://www.hmr.fo/fo/kunning/tidindi/landsstyrismadurin-fegnast-um-mr-skannaran/