Byrjandi við hvar há- og lágtrýst liggja, og hvønn vegin tey ganga, so liggja vit undir einum hátrýsti fyrin tíðina. Tá er vanliga gott veður við lítlum vindi og ongum ella næstan ongum avfalli, og skýloftið skiftandi ella klárt.

Soleiðis hevur tað verið næstan í eina heila viku, og veðurkortini siga frá sama veðri næstu 8 ella 10 dagarnar.

Rundan um eitt hátrýst melur luftin við klokkuni, og eftirsum at miðjan á hátrýstinum er sunnan fyri Føroyar, kemur lotið til okkara vestaneftir. Ikki av beinum vestri alla tíðina, men eisini av útsynningi viðhvørt.

Miðjan á hátrýstinum var á middegi í dag ímillum Skotland og Føroyar. Gott veður er á allari leiðini. Kort: Metoffice.gov.uk

Mikudagin fer hann at mala av ymsum ættum; hósdagin og nakrar dagar fram fer ættin at liggja millum útsynning og sunnan.

Ongantíð nógvur vindur, mesta vindferðin alla vikuna fer at liggja um 8 m/s – tað er tað vit kalla eitt frískt lot.

Í dag er lot til frískt lot vestan ella av útsynningi, 3 til 8 m/s, í støðum frískur vindur, 10 m/s. Skiftandi skýloft við sól av og á. Í nátt minkar hann vindin niður í lot vestan, undir 6 m/s. Skýggjað og í støðum támut, møguliga regn ella sirm av og á. Hitin í dag verður millum 9 og 13 stig, í nátt niður í 8 stig.

Í morgin, týsdagin, er aftur lot til frískt lot vestan, 3 til 8 m/s. Skiftandi skýloft, stundum við sól, men eisini sirm av og á. Í støðum verða mjørkalíkindir, serliga um náttina. Hitin verður millum 8 og 13 stig, um náttina niður í 6 til 9 stig.

Í ovurmorgin, mikudagur, er framvegis lot til frískt lot vestan, 3 til 8 m/s, men út út á seinnapartin fer hann at mala av ymsum ættum. Skiftandi skýloft, stundum við sól, men eisini sirm av og á. Í støðum verða mjørkalíkindir, serliga um náttina. Hitin verður millum 8 og 12 stig, um náttina niður í 7 stig.

Hósdagin skulu vi vænta lot av ymsum ættum, undir 6 m/s. Skiftandi skýloft við nakað av sól, men eisini mjørki í støðum, serliga um náttina. Hitin verður millum 9 og 12 stig, um náttina niður í 6 til 9 stig.

Fríggjadagin lot til frískt lot sunnan, 3 til 8 m/s. Skiftandi skýloft við nakað av sól, men eisini tám ella mjørki í støðum, serliga um náttina. Hitin verður millum 9 og 13 stig, um náttina niður í 8 stig.

Í vikuskiftinum fer veðrið at vera nakað tað sum fríggjadagin, men eftirsum óvissan er so stór, so bíða vit við tí í nakrar dagar.