Nú er greitt, at Team Klaksvík skal hava nýggjan høvuðsvenjara. Óli á Gravarbø, formaður í Team Klaksvík váttar, at eftir at hava tosað saman síðstu dagarnar eru báðir partar samdir um at enda samstarvið. Finnur Hansson byrjaði sum venjari hjá Team Klaksvík í hesum umfarinum í summar. Hann stóð á odda fyri liðnum til fyrstu dystirnar í altjóða hondbólti hjá felagnum, tá liðið spældi í Bosnia & Hersegovina.

Óli sigur, at Team Klaksvík er í gongd við at finna eina loysn á venjarasíðuni, men trupult er at siga, nær komið verður á mál við hesum.

Fleiri leikarar eru givnir

Í hópinum eru eisini umfatandi broytingar. Bryan Slyne og Suni E. Dalsgaard eru givnir í felagnum, meðan Jure Fistonic er farin av landinum og kemur ikki aftur. Síðani raka skaðar hart á lokala partin av hópinum. Jens Pauli Poulsen og Petur Martin Eliasen eru langtíðarskaddir, meðan tað er meira óvist, nær Sámal á Tjaldrafløttii verður heilt klárur klárur aftur.

Teir ungu fáa møguleikan

Óli á Gravarbø sigur, at grundarlagið í hópinum er ikki tað besta í løtuni, men at hetta eisini ger, at ungir lokalir leikarar fáa møguleikan. Fýra U16-leikarar venja javnan við, og fleiri eru á veg, so tað eru glottar at hóma, sigur hann. Tveir U16-leikarar hava eisini longu fingið fitt av spælitíð.

Í landskappingini liggur Team Klaksvík á 6. plássi av 7 liðum við fimm stigum fyri 10 dystir. Seks lið sleppa í endaspælið. Komandi dystur í landskappingini er 24. januar. Átta dystir eru eftir í landskappingini. Í steypakappingini er Team Klaksvík útsligið.