Lágtrýst fara at leggja seg eystan fyri Føroyar og draga hesa køldu luftina til sín, og tá liggja Føroyar mitt á leiðini.

Kuldin kemur ikki einsamallur. Við honum kemur ælaveður við kava, viðhvørt vátakava.  

Veðrið í vikuni - dag fyri dag:

Mánadag:

Um morgunin 5 til 10 m/s, av landnyrðingi, men út á seinnapartin gongur hann niður í eystan ella landsynning og veksur upp í 10 til 13 m/s. Loftið er samdrigið og ælaveður við vátakava ella kava.  

Um kvøldið og um náttina kavar kring alt landið, og vindurin fer sum frálíður upp í 15 m/s við hvirlum upp í 20 m/s. Hitin mánadagin úr 1 kuldastigi upp í 3 hitastig.

Týsdag:

Um morgunin fer hann aftur at liggja av landnyrðingi, 8 til 13 m/s, í støðum upp í 15 m/s. Hvirlurnar kunnu tó fara upp í 20 m/s. Skiftandi skýloft og kavaavfall, í støðum vátakavi. Seinnapartin minkandi vindur niður í 5 til 10 m/s, og sum frálíður klárari og bert fá kavaæl í støðum. Hitin millum 3 kuldastig og 2 hitastig.

Mikudag:

Minni vindur, 3 til 8 m/s av útnyrðingi. Loftið verður skiftandi við kava- ella vátakavaavfalli. Hitin fer at liggja um 2-3 stig báðumegin frostmarkið.

Hósdag:

Veksandi vindur upp í 8 til 13 m/s norðan. Loftið verður skýggjað, og vit skulu rokna við ælaveðri við kava. Hitin fer at liggja 3 stig báðumegin frostmarkið.

Fríggjadag:

Eitt sindur minni vindur, um 5 til 10 m/s, og ættin fer at liggja millum norðan og útnyrðing. Skýloftið verður skiftandi við kava ella vátakava. Hitin úr 2 kuldastigum upp í 3 hitastig.