Tað endaði 3-0 til HB, sum longu hevði avgjørt dystin, tá ein lítil løta av seinna hálvleikin var spæld. Áki Samuelsen var stóri leikarin og skoraði hattrik. Leikliga var hetta ein av frægu dystunum hjá KÍ, tá tað kom til at skapa málmøguleikar móti ovaru liðunum, men leikararnir vóru alt ov óneyvir frammanfyri Teiti M. Gestssyni. Í verjupartinum var KÍ-liðið ikki nóg væl skipað, men tað var heldur ikki væntandi, tí á liðnum hesaferð vóru nógvir leikarar í verjupartinum, sum einki ella lítið hava spælt síðstu vikurnar vegna skaðar ella annað. HB hevur eitt venjaratoymið við royndum frá sera høgum stigi, og tað sást aftur. Tað er øgiligur munur á, hvussu nógv meir HB mennist gjøgnum kappingina enn t.d. KÍ.

Tveir týdningarmiklir dystir í bronsustríðnum

Á norðoyastevnu skrivaðu vit, at KÍ var næstan úti av FM-stríðnum. Nú kann næstan skiftast út við endaliga. Hjá KÍ snýr kappingin nú um at vinna dystin um bronsuna, sum er síðsta plássið, sum við vissu gevur Europapláss, um B36 endar aftanfyri nummar 4, sum liðið liggur nú. KÍ fær komandi tvær vikurnar vitjan av nr. 4 og 5. NSÍ liggur 5 stig aftanfyri og B36 liggur 10 stig aftanfyri. Eftir tað liggja tveir avgerandi dystir fyri framman í Champions League. Tveir dystir sum fáa sera stóran týdning bæði ítróttarliga og fíggjarliga fyri KÍ, sum í 2025 fer at hava nógv lægri inntøkur, nú meistaraheitið er farið.