Í heimligu kappingini er KÍ úti av kappingini um løgmanssteypið og mest sannlíkt úti av FM-stríðnum, hóast øll ikki eru samd í tí. Tað ger, at KÍ mest sannlíkt ikki kemur at luttaka í Champions League í 2025, og tá verður vegurin til eitt bólkaspæl nógv torførari, tí meistarin hevur altíð minst ein eykamøguleika og vinnur hann fyrsta umfar, so hevur hann ein eykamøguleika afturat.

1. umfar er mest avgerandi, tí vinnarin av fyrsta umfari tryggjar sær at fara niður í Europa League, um hann tapir seinni, meðan taparin í 1. umfari leypur Europa League um og ferð niður í 2. umfar í Conference League.

Tí er hetta umfarið sera avgerandi fyri møguleikarnar at koma í bólkaspæl. Og enn týdningarmiklari er tað av tí orsøk, at tapur KÍ 1. umfar, so er ein lutfalsliga stórur møguleiki fyri, at KÍ endar í Kasakhstan í 2. umfari í Conference League og tað verður ein sera long, avbjóðandi og ikki minst dýr ferð.

Vinnur KÍ seg víðari úr 1. umfari, so hevur KÍ tryggjað sær 5,6 milliónir afturat teimum 7,2 milliónunum, sum eru tryggjaðir sum minsta upphædd. Umframt at KÍ styrkir um sítt styrkistal, sum aftur betrar um møguleikarnar fyri at blíva oftari styrkismettur í framtíðini.

Í dag kl. 16.30 hevur KÍ síðstu venjingina undan dystinum og kl. 19.00 venur Differdange 03.

KÍ-Differdange 03 spæla mikukvøldið kl. 19.00 við Djúpumýrar. Atgongumerki fáast til keyps á ki.fo.