Nú hvítna tindar
Sum spátt varð fyrr í vikuni, so vóru fjøllini hvít í morgun. Hann gekk upp í norðan seinnapartin mánadagin, og hann hevur ligið tráur millum norðan og útnyrðing líka síðan.
At hann liggur høgt merkir ikki altíð, at tað gerst hvítt í erva. Tað velst um, hvussu langt norðuri lutin hevur sín uppruna, ella – sagt eitt sindur tekniskt – hvar er hátrýstið, haðani luftin er send ímóti okkum.
Reyðu pílarnir vísa, hvaðani kalda lotið kemur.
Síðan mánakvøldið hevur luft streymað ímóti okkum av leiðunum norðan fyri Svalbard, og har norðuri er kalt – eini 10-15 kuldastig ella so. Luftin er ornað á vegnum suðureftir ímóti okkum.
Hitalagið í vikuskiftinum áðrenn høgættina lág um 12-15 stig, og kalda luftin norðaneftir fór beinanvegin at køla niður her hjá okkum. Í morgun vístu hitamátarar 4 stig nógvastaðni. Tá ið tað eru 4 stig niðri við sjóvarmálan, liggur hitalagið 400 metrar uppi um frostmarkið, og í teimu høgu fjøllunum nøkur stig undir frostmarkinum.
Í ár vórðu fjøllini fyrstu ferð hvít 12. september. Tað var tað eisini í fjør.
Niðanfyri eru myndir, vit hava fingið sendandi ymsastani frá.
Grísla- og Botnstindur á Kalsoynni
Lokkin eisini hvítur í morgun
Reynsatindur og Jógvansfjall avmyndað úr Sandavági í morgun.