Súsanna Olsen er býráðslimur fyri Framsókn í Tórshavnar Býráði og hevur verið virkin í tí leiklutinum.

2. februar í ár slapp hesin býráðslimurin – uttan í heila tikið at verða presenterað sum kommunustýrislimur í Tórshavnar Kommunu – at úttala seg sum stjórnmálafrøðingur í táverandi orrustuni um skannaran til Klaksvíkar Sjúkrahús. Beinanvegin sendingin byrjaði, vistu vit, hvat klokkan var sligin. Hon fór at úttala seg til fyrimuns fyri Tórshavn og ímóti Klaksvík.

Og so varð. Gávan til Klaksvíkar Sjúkrahús varð framsett sum eitt eyðkenni fyri oligarki ella fámannaveldi, meðan ikki eitt orð varð sagt um, at sjúkrahúsið í hennara egnu kommunu bæði í 1998 og í 2013 eisini hevði fingið skannarar í gávu frá eini stórari og ríkari fyritøku. Ein objektivur frøðingur hevði tikið við, at gávan til Klaksvíkar Sjúkrahús ikki var nakað eindømi, men at sjúkrahúsið í Havn meira enn einaferð hevur staðið í identiskum støðum og tikið ímóti gávum frá vinnuni. Tað bleiv ikki tikið upp á tungu, og tað var tí greitt, at tað var býráðslimurin og ikki stjórnmálafrøðingurin, sum hevði orðið.

Í Breddanum 10. oktober slapp sami býráðspolitikari – enn einaferð uttan at verða presenteraður sum býráðspolitikari – aftur í Breddan at tosa um evnið polarisering, m.a. millum útjaðara og miðstað, saman við tveimum serfrøðingum. Nortið varð m.a. við fiskivinnuna og framleiðslu-Føroyar, sum býráðslimurin segði ikki eksistera (”soleiðis hongur tað ikki saman”), og hon fekk onki mótspæl.

Vit mugu tí seta KvF nakrar spurningar: Hví er tað í lagi, at politikarar hjá Framsókn sleppa í Breddan sum serfrøðingar undir einum valstríði?, Fara aðrir flokkar enn Framsókn at fáa sama møguleika nú undir valstríðnum?, Fara kommunalpolitikarar úr øðrum kommunum enn Tórshavnar at fáa sama møguleika nú undir valstríðnum?, Fer tað at vera linjan framyvir, at politikarar hava ta atgongdina til mikrofonir í KvF í komandi valstríðum?

Og hevur KvF í minsta lagi ikki skyldu til at presentera hesar politikararnar sum politikarar?