Norðlýsið hevur greitt sera væl og álvarsamt frá hesum lógaruppskotinum, hvørs endamál enntá búskaparliga serfrøðin hevur mælt frá at seta í verk.

Uppskotið fer m.a. at raka og seta forðingar fyri fiskivinnuni í Klaksvík, Gøtu og Fuglafirði.

Hanus Hansen, reiðari í JFK í Klaksvík, hevur greitt alment frá, at hetta er eitt álvarsligt bakkast fyri reiðaríið.

Víðari hevur hann greitt frá, at tað gevur ikki meining og er órættvíst, at alivinnan og fiskivinnan, sum báðar eru tilfeingisvinnur, ikki fáa somu, ella í minsta lagi, líknandi treytir og karmar at virka undir.

Sum býráðslimur og annar varaborgarstjóri í Klaksvíkar býráð, kenni eg tað sum mína skyldu at mótmæla hesum ætlanum hjá landsstýrinum.

Eg heiti staðiliga á allar løgtingslimir, sum hava umsorgan fyri vinnuni, um at gera sína ávirkan galdandi.

Hetta kennist veruliga sum eitt álop, ikki bara á Norðoyggjar og Klaksvík, men á tað samlaða Norðurøkið.

Hetta økið hevur satsað og gjørt íløgur í fiskivinnuna, og tí hava vit sum øki ikki uppiborið slíka viðferð.

Klaksvík, 2. januar 2025
Jógvan Skorheim, býráðslimur og 2. varaborgarstjóri í Klaksvíkar kommunu.