Longu nú er skráin fyri teirra gonguferðir í 2025 løgd, so tey vita, havt teimum stendur í boði eitt heilt ár fram.

Tey ferðast eisini til ymisk støð at síggja seg um, so sum síðsta leygardag, tá ið limir úr Tórshavnar Gongufelag vitjaðu Varpið og fingu eina fragreiðing um húsið og virksemið har frá Dáva Winther.

Síðani gekk leiðin um miðbýin, har greitt var frá nógvu byggjuætlanunum har, yvir í neystið hjá Klaksvíkar Róðrarfelag. Har greiddi Sonja Kjølbro hugtakandi frá teirra arbeiði, arkitekturi og ikki minst serstøku listini hjá Edward Fuglø - ein bátur hjá Niklas í Koltri, sum er sundurtikin og bygdur uppaftur sum eitt listaverk - ein dreki, ið hevur vakt stóran áhuga fýri húsinum víða um.

Húsið er annars so sermerkt, at tað stóð til ein altjóða arkitektaheiður í fjør. Jú, sanniliga man hetta vera heimsins flottasta og besta róðrarneyst. Úrslitini eru eisini hareftir.

Leiðin lá so til Norðoya Fornminnasavn. Tá ið lagt varð upp til at koyra, tí kavaveður var, varð mótmælt! Nei, vit skulu ganga, bleiv sagt - Vit eru eitt gongufelag!

Á Norðoya Fornminnasavni vísti Helena K. Sundsskarð runt í teimum ymsu hølunum, handlinum og gamla apotekinum, sum er tað einasta í ríkinum av sínum slag, umframt tað í Gamle By í Århus.

Eftir rundferðina fóru øll á vitjan á Kafé Fríðu, har tey fingu ein betri bita. Tey vóru takksom og hildu, at Klaksvík hevði nógv áhugavert at bjóða.