Páll Holm Johannesen, stjóri í felagnum Nótaskip, førir í samrøðu við Kringvarpið fram, at tey síðstu 10 árini eru komin nógv fleiri skip í flotan, meðan kvoturnar vóru høgar, men at tær nú lækka munandi. Eisini fara fráboðaðu hækkingarnar av veiðigjøldunum at gera, at tað ikki er skilagott at sundurpetta verandi virksemi hjá núverandi aktørunum fyri at geva øðrum. Stjórin í felagnum Nótaskip sigur eisini, at har longu eru fleiri nýggir aktørar og nýggj skip í vinnuni.

Felagið Nótaskip undrast eisini – eins og onnur – á, at so stórur munur skal gerast á teimum føroysku vinnugreinunum. Sum dømi nevnir hann, at samgongan onki ger fyri býta virksemið í bankageiranum, tryggingargeiranum ella aligeiranum í smærri eindir fyri at loyva fleiri aktørum inn í tær vinnurnar, og at tað er undarligt, at fiskivinnan skal vera vald út til at hava fleiri smáar aktørar heldur enn færri sterkar aktørar.

Eisini sigur Páll Holm Johannesen, at tá ið kvoturnar blíva hægri enn ávís mørk, so fellur tað, sum er omanfyri, sambært uppskotinum hjá Dennisi Holm bara teimum smáu aktørunum í lut. Núverandi aktørarnir standa hinvegin til at missa munandi, og tað heldur felagið Nótaskip ikki vera í lagi.