Týsdagin 18. februar kl. 16.00 greiðir Uni Arge frá úr bókum sínum ”Veðursjúka I og II”

Greitt verður m.a. frá um, at vit stundum gerast veðursjúk, og at nú sigst veðrið eisini sjálvt at vera vorðið sjúkt – onkur heldur so sjúkt, at tað hóttir klótuna.

Hvussu navigerar einstaklingurin í tí hesum veðurlagnum? Hetta mala bøkurnar rundanum - við speisemi, sorgblídni og skemti.

Allir føroyingar eru áhugagaðir í veðrinum, so tó at teir ikki beinleiðir ERU veðursjúkir, so kunnu fleiri ávirkast av veðrinum – eisini við atliti til sjógvin og sjálvandi egið húsarhald annars.

Útgangsstøðið er Føroyar og føroyingurin - í nútíð og søgu.

Kaffi er eisini á kannuni

Mikudagin 19. februar kl. 16.00 greiðir Andrass Henriksen úr Sørvági frá norska skipinum Silvu, sum var í Føroyum undir seinna heimsbardaga.

Hetta verður gjørt bæði við orðum og myndum. Eisini letur hann pápa sín, Jóhannes Henriksen, sála, sum sigldi við Silvu, greiða frá á video, um ta ferðina, teir vóru bumbaðir á vágni í Klaksvík. 

Kaffi er eisini á kannuni og gott prát

Hósdagin 20. februar kl. 16.00  Poul Sivar greiðir frá uppvøkstri sínum í Svínoy og um ferðir á fiskileið á Flemmish Kap.

Í Svínoy sleit Poul Sivar sínar barnaskógvar – Hann er føddur í 1955. Tá hann fór í skúla vóru tveir klassar, eldri og yngri klassi. Í eldra klassa vóru 16 børn, 8 gentur og 8 dreingir. Tað vóru nakað væl minni av børnum í yngra klassa. Karl var lærari.

Har var vítt um at fara og var øll bygdin eitt stórt spælipláss – fjøran, bøurin, hagin og onkuntíð flutu teir eisini.

Tá ið skúlin var liðugur, fór Poul Sivar til skips 17 ára gamal tað var við Jógvan S. og lá leiðin til Ísland, á Jøklagrunnin.

Fyrstu ferð hann var á Flemish Kap var 17. mars 1973 við Jógvan S. Skipari var Leivur Zachariassen. Tá hann verið tríggjar isfiskatúrar fammanundan.

Poul Sivar hevur verið heili 12 saltfiskatúrar á Flemmish Kap. Frásøgumaður er hann góður, so okkurt áhugavert og skemtiligt verður helst á skrá.

Kaffi er eisini á kannuni og gott prát afturvið!

Evsta mark fyri at fáa tiltøk á Torraskránna er komandi fríggjadag 7. februar á miðdegi.

Torradagar í Klaksvík