Hetta skuldi givið góð sannlíkindi fyri, at nógv olja eisini er í føroyskum øki. Sjálv hevur Elsebeth sett vinnumálaráðharranum fleiri fyrispurningar um málið, og nú mettu uppskotsstillararnir, at tíðin var komin til, at borið verður so í bandi, at kolvetnisskattur og partafelagsskattur verða javnsettir. Í løtuni er kolvetnisskatturin 27%, meðan partafelagsskatturin er 18%. Framyvir skulu báðir vera 18%, stendur tað til uppskotsstillararnar.

Orsøkin til, at hetta verður skotið upp, er at gera tað lokkandi fyri oljufeløg at leita við Føroyar. Elsebeth spyr retoriskt, hvat tað er, sum ger, at oljufeløgini eru beint við síðuna av markinum, men síðani 2014 ikki eru komin til Føroya, og metir, at skattatrýstið er ein orsøk. Seinasti brunnurin kostaði 1,6 milliard at bora, meðan tað kanska kostar 30, 40 ella 50 milliónir at bora tætt við land. So tað er dýrt at bora á djúpum havi.

Tey skjóta tí upp at lækka kolvetnisskattin til sama støði sum partafelagsskattin og vænta, at tað fer at gera, at oljufeløgini aftur vilja koma til Føroya at leita eftir olju.  

Elsebeth M. Gunnleygsdóttur sigur, at tá ið hon hevur sett fyrispurningar um málið, so hava tingfólk úr serliga Sambandsflokkinum, Miðflokkinum og Fólkaflokkinum verið áhugað og positiv, eins og at hon eisini hevur merkt áhuga og positivitet frá tingfólkum úr øðrum flokkum, men viðvíkjandi teimum viðgongur hon, at hon ikki er serliga vís í, at tey fara at atkvøða fyri uppskotinum.  

Spurd um, hvørt hon siktar eftir einum oljumálaráðharrasessi eftir komandi val, nú Fólkaflokkurin fær so góðar veljarakanningar upp á strípu, svarar Elsebeth Mercedis Gunnleygsdóttir, at hon vónar bert at verða innvald. Men skuldi sessurin staðið henni í boði, tekur hon av, leggur hon avgjørd afturat:

– ”Og fái eg sessin eftir komandi løgtingsval, so verður farið undir at bora eftir olju aftur, áðrenn tað valskeiðið er av, tí eg gevist ongantíð, áðrenn eg eri komin á mál”, sigur Elsebeth Mercedis Gunnleygsdóttur, løgtingskvinna fyri Fólkaflokkin, at enda í samrøðuni.

Talan er um tingmenninar Steffan Klein Poulsen og Jenis av Rana fyri Miðflokkin, Bárð á Steig Nielsen fyri Sambandsflokkin, og Beinir Johannesen fyri Fólkaflokkin, og tingkvinnurnar Eyðdis Hartmann Niclasen fyri Sambandsflokkin og Elsebeth Mercedis Gunnleygsdóttur fyri Fólkaflokkin, ið hava lagt uppskotið fram.

Uppskotið kann lesast á heimasíðu Løgtingsins her:

https://www.logting.fo/mal/mal/?id=11069