Nógv spennandi hendir í Spinnarínum á Torradøgum. Umframt søluframsýning, opið hús og ullaskeið er eisini ein framsýning við vovnum teppum, ið 43 ára gamla Jana Skorheim Sørensen hevur gjørt. Hetta er fyrsta framsýning hennara.

Í morgun sótu nakrar damur og karðaði, meðan aðrar spunnu. Spinnaríið við Ánna hevði søluframsýning við tógvi úr føroyskari ull, sum m.a. er komin av Skarvanesi.

Jana er fødd og uppvaksin í Havn og hevur ættarbond í Klaksvík, tí mamman er ættað hiðani. Jana er í vardum starvi sum hjálparfólk í Frítíðarskúlanum í  Badmintonhøllini í Havn, har hon hevur arbeitt í 25 ár. 

Teppini, sum hon sýnir fram, hevur hon seymað saman úr puntum, sum hon hevur vovið á fýra ymiskum hondgjørdum vevum. Puntarnar hevur Jana sjálv sett og seymað saman, og síðan hevur hon fingið seymistovuna hjá Dianu at hjálpa sær við at seyma baksíðuna í liti, sum Jana helt hóskaði til puntarnar.

Á framsýningini sýnir Jana Skorheim Sørensen fram fýra teppi, sum hon hevur gjørt. Framsýningin læt upp í dag. Áhugafelagið, Spinnaríið bjóðaði kaffi og okkurt søtt afturvið.

Framsýningin er opin aftur fríggjadagin og leygardagin í Torravikuni. Allar dagar frá kl. 10 til 16. Samstundis hevur Spinnaríið við Ánna søluframsýning við tógvi úr føroyskari ull, og møguleiki er eisini at síggja ullavirking hjá kvøldskúlaluttakarum og øðrum.