Fyri fáum árum síðani varð samfelagsfrøði innførd sum kravd lærugrein í framhaldsdeildini í fólkaskúlanum. Talan er um somu árgangir, sum vikuskifti eftir vikuskifti skipa fyri bingo, køkutombola, skava & vinn og lutaseðlasølu fyri at fáa pening til vega til námsferð. Tí er neyvan nakar ivi um, at tað í samfelagsfrøðitímunum í 9.-flokkunum hesa vikuna verður fylgt við stórum áhuga við í námsferðini hjá teimum 174 kommunustýrislimunum til Íslands.

Í tíðindunum hava vit nevniliga frætt, at bý- og bygdarráðslimirnir ikki koma til skeið hjá Kommunufelagnum, um felagið heldur skeiðini í Føroyum, og á tann hátt hava teir fingið skattgjaldaran at goldið uttanlandsferð til kommunustýrislimirnar í staðin. Tað hevur víst seg at verið ein stór success, og uppmøtingin er í topp. 

Tí er upplagt, at samfelagsfrøði-lærararnir kring landið bjóðaðu kommunustýrislimunum á skúlan at greiða frá túrinum til Íslands. Næmingarnir eru heilt víst áhugaðir í, hvussu ein tílíkur túrur kann lata seg gera uttan peningainnsavning, og ikki minst í at læra, hvussu nógv í grundini kann røkkast við bert at lata vera við at møta upp til undirvísing, um ein ikki fær skattgoldna uttanlandsferð. Uttan iva fæst nógvur íblástur úr at hoyra um leistin hjá teimum fólkavaldu.

Um fíggjarætlanirnar hjá skúlanum annars loyva tí, so kundu skúlarnir bjóðað kommunustýrislimunum eina máltíð afturfyri, um tað nú er tað, sum skal til fyri at fáa teir at koma.