Ættin fer at liggja um útsynning, við onkrum avstingara niður í sunnan ella upp í vestan. Ikki lítil vindur, men tó ikki illveður – tó at  tað fer at kennast eitt sindur ilsligt viðhvørt.

Vit taka tað úr einum enda:

Hann liggur nú seinnapartin um sunnan, frískur vindur upp í hvassan vind sunnan, 10 til 15 m/s, í kvøld stundum upp í skrið, 18 m/s, og tað er skýggjað og ælaveður, í kvøld regn. Seint í kvøld heldur minni vindur eitt skiftið, frískur vindur til strúk av útsynningi, 8 til 13 m/s. Í nátt veksur hann upp í frískan vind upp í hvassan vind av útsynningi, 10 til 15 m/s, stundum upp í skrið, 18 m/s, við skiftandi skýlofti og ælaveðri, kanska eisini við vátakava. Hitin millum 4 og 8 stig.

Váttligt í morgin, tó ikki alla tíðina. Fyrrapartin er strúkur í vindi upp í skrið av útsynningi, 13 til 18 m/s, við skiftandi skýlofti og ælaveðri, kanska við vátakava. Út á seinnapartin minkar hann til frískan vind upp í hvassan vind av útsynningi, 10 til 15 m/s, tó í støðum skrið, 18 m/s. Um náttina er frískur vindur upp í hvassan vind av útsynningi, 10 til 15 m/s, samdrigið og bert okkurt ælið. Hitin millum 4 og 9 stig.

Eisini vátt sunnudagin. Vit fara at fáa ein strúk í vindi upp í skrið av útsynningi, 13 til 18 m/s, loftið skýggjað, og tað regnar. Seinnapartin gongur hann upp í vestan og minkar vindurin niður í eitt frískt lot til frískan vind, 5 til 10 m/s, skýloftið skiftandi og ælaveður. Sunnukvøldið frískur vindur til hvassan vind av útsynningi, 10 til 15 m/s, men um náttina upp í skrið, 20 m/s. Vit skulu rokna við skiftandi skýlofti og ælaveðri, sum frálíður eisini við vátakava. Hitin millum 4 og 9 stig.

Gott vikuskifti.