Formliga er tað løgmaður, ið setir landsstýrisfólk í starv og loysir tey úr starvi. Men í praksis fáa flokkarnir í samgongu eitt ávíst tal av landsstýrissessum, sum flokkarnir sjálvir fylla. Í Tjóðveldi eru mannagongdar um val av landsstýrisfólki skrivaðar í §§32-33 í skipan floksins.

Herí stendur, at tað eru 1) aðalstjórn floksins, og 2) tingbólkur floksins, sum í felag viðgera týðandi politiskar avgerðir, herundir tilnevning av landsstýrisfólkum. Aðalstjórnin hevur 13 limir, eitt tilnevnt av hvørjum av teimum 7 økisfeløgunum, eitt tilnevnt av Unga Tjóðveldi, 4 tilnevnd av flokstinginum og eitt tilnevnt av tingbólkinum. Tingbólkur floksins er tey 6 løgtingsfólkini hjá flokkinum.

Aðalstjórnin og tingbólkurin gera síðani tilmæli um landsstýrisfólkaevni í felag til tingbólkin at taka endaliga avgerð um við atkvøðugreiðslu. Er ein meiriluti av tingbólkinum samdur um eitt landsstýrisfólk, verður tann persónurin landsstýrisfólk floksins. Er ikki meiriluti fyri einum landsstýrisevni í tingbólkinum, verður tað forkvinnan, ið tekur endaligu avgerðina, stendur í stk. 2 til §33.

Hetta merkir í verandi støðu, nú Tjóðveldi hevur 6 tingfólk, at eitt landsstýrisfólk skal, eftir at verða skotið upp av aðalstjórnini og tingbólkinum, hava í minsta lagi 4 av tingfólkum floksins aftan fyri seg. Hevur ongin tað, kann Sirið Stenberg sum floksforkvinna skera ígjøgnum.