Hósdagin og fríggjadagin fer eitt hátrýst at mennast yvir leiðini vestan fyri Føroyar, og tað fer at halda lágtrýstunum burtur frá okkum. Vit fara tí at fáa eitt annað veðurmynstur við lítlum vindi, og góðum veðri – serliga fríggjadagin.

Veðrið í vikuni – dag fyri dag:

Mánadagin (restina av degnum í dag):
Frískur vindur upp í strúk, 8 til 13 m/s. Í nátt stundum upp í hvassan vind, 15 m/s, skýggjað og ælaveður. Hitin millum 3 og 7 stig, í nátt millum 5 og 9 stig.

Týsdagin:

Frískur vindur upp í strúk av útsynningi, 8 til 13 m/s. Fram ímóti middegi veksur hann upp í strúk í vindi upp í skrið av útsynningi, 13 til 18 m/s. Seinnapartin gongur hann upp í vestan. Loftið samdrigið og samregn. Um kvøldið minkar hann vindin niður í frískan ella hvassan vind av útsynningi, 10 til 15 m/s, hálvskýggjað loft og ælaveður, møguliga við vátakava. Hitin millum 4 og 9 stig.

Mikudagin:

Lot av ymsum ættum, minni enn 8 m/s, skýggjað og regn. Seinnapartin meiri vindur: frískur vindur upp í hvassan vind av útsynningi, 10 til 15 m/s. Loftið skýggjað og ælaveður. Um kvøldið strúkur í vindi upp í skrið av útsynningi, 13 til 18 m/s, hálvskýggjað og yvirhøvur turt. Hitin 5 til 10 stig.

Hósdagin:

Frískt lot til frískan vind av útsynningi, 5 til 10 m/s, hálvskýggjað við sólglottum og yvirhøvur turt. Út á dagin lítið lot av ymsum ættum, minni enn 5 m/s, skýggjað og ælaveður. Møguliga okkurt vátakavaælið um náttina. Hitin um dagin millum 5 og 7 stig; um kvøldið og náttina millum 1 og 6 stig.

Fríggjadagin:

Lot til frískt lot vestan ella av ymsum ættum, 3 til 8 m/s, hálvskýggjað við sólglottum og kanska okkurt ælið seinnapartin. Hitin um dagin 5 til 7 stig, um náttina úr 1 stigi undir frostmarkinum upp í 5 stig.