Songkvinnan Linda Andrews fer at hava konsert á Summar Festivalinum í ár.

Fyri umleið tretivu árum síðani flutti hon til Danmarkar at royna seg sum songkvinna, og væl hevur gingist henni.

Hon fekk stóra gjøgnumbrotið í breiðu fjøldini, tá ið hon í 2009 vann donsku X Factor kappingina. Hon vann kappingina sannførandi við framúr framførslum og einari fantastiskari rødd.

Linda hevur útgivið átta plátur, og tvær av teimum hava fingið sonevnda platin-heiðursløn fyri sølu í Danmark.

Hon hevur eisini verið sera virkin sum kórsangari og hevur sungið saman við eitt nú Blå Øjne, Clemens, The Antonelli Orchestra, Carolu, Johnny Logan, SNAP og fleiri. Hon hevur eisini fleiri ferðir verið kórsangari í Grand Prixnum og hevur stjórnað fleiri kórum.

Linda Andrews hevur framførslu á Summar Festivalinum, sum verður hildin dagarnar 7. til 9. august.