Í dag skal KÍ royna at venda hagtølunum í Havn, sum siga tap síðstu fýra dystirnar.

KÍ spældi eisini í fjør í 2. umfari í Gundadali móti B36. Í einum illa spældum dysti, serliga frá KÍ, vann B36 2-0 og tað bleiv byrjanin til eina tíð, har KÍ ’’misti’’ meistaraheitið áðrenn summarsteðgin.

B36 var bara sekund frá at fáa stig við Løkin í 1. umfari, meðan KÍ var betra liðið, men sum tó kundi havt sett stig til móti 07 Vestur, sum hevði tveir stórar møguleikar at javna síðsta partin av dystinum. Tí er lagt upp til ein spennandi dyst í Gundadali. Hjá KÍ er Robert Williams skaddur, meðan ivamál er um Deni Pavlovic. Annars eru allir leikarar tøkir.

Dysturin í Gundadali byrjar kl. 15.00. Dómari verður Dagfinn Forná.