Tað er eitt lágrýst, sum liggur eystan fyri Føroyar, sum stýrir veðrinum. Tað dregur kalda luft av leiðunum lagt norðanfyri ímóti Føroyum. Fyrrapartin í morgin er lágtrýstið farið so langt eystureftir, at missir megina í Føroyum.

So er ein glotti við góðum veðri, til tað næsta lágtrýtið kemur. Tað fara vit at merkja longu seinnapartin í morgin.  

Fari ikki at troytta tykkum við fleiri smálutum, men fari heldur til veðrið hetta vikuskiftið dag fyri dag:

Í dag er ein strúkur vindur upp í skrið norðan, 13 til 18 m/s, skýggjað og regn ella ælaveður, í støðum við vátakava ella kava. Í kvøld minkar hann vindin niður í frískan vind ella strúk í vindi av útnyrðingi, 8 til 13 m/s, skýggjað og við kava- ella vátakavaæli. Í nátt niður í lítið lot ella frískt lot av útnyrðingi, minni enn 8 m/s, skiftandi skýloft og bert okkurt kavaælið. Hitin úr 2 kuldastigum upp í 4 stig.

Fyrrapartin í morgin lítið lot av ymsum ættum, minni enn 5 m/s, skiftandi skýloft og yvirhøvur turt. Síðan veksur hann vindin. Fram ímóti middegi frískur vindur upp í strúk strúk av landsynningi, 8 til 13 m/s, ímóti kvøldið strúkur í vindi upp í skrið eystan, 13 til 18 m/s, samdrigið og regn, í støðum kavi ella vátakavi. Um náttina frískur vindur upp í strúk av landnyrðingi, 8 til 13 m/s, skiftandi skýloft og tað slítur í. Hitin úr frostmarkinum upp í 6 stig.

Sunnudagin er eitt lítið lot upp í frískt lot av ymsum ættum, minni enn 8 m/s, skýggjað og yvirhøvur turt. Út á kvøldið veksur hann vindin upp í frískan vind ella ein strúk í vindi sunnan, 8 til 13 m/s, framvegis skýggjað og yvirhøvur turt, men um náttina kunnu vit vænta regn. Hitin 2 til 7 stig. Út á kvøldið og um náttina 6 til 9 stig.

Gott vikuskifti.