Í kvøld skal KÍ royna at vinna 4. sigurin hetta kappingarárið, tá KÍ vitjar á Svangaskarði.

B68 kemur frá einum søguligum 11-0 tapi í Runavík og hevur Jákup N. Vilhelmsen og Sebastian Lau Nielsen uttanfyri við leikbanni. Spurningurin er so, hvat eitt slíkt úrslit ger við B68, sum frammanundan hevur sæð út sum eitt fínt lið, sum m.a. var leikliga omaná stóran part av útidystinum móti HB í 1. umfari. Tvær tær seinastu ferðirnar, har KÍ hevur vitjað á Svangaskarði hevur KÍ vunnið við einum og tveimum málum, so hagtølini benda á ein spennandi dyst.

Hjá KÍ er Jákup B. Andreasen tøkur eftir leikbann, meðan Filip Brattbakk møguliga eisini verður tøkur í mun til seinast. René S. Joensen er skaddur, meðan ivamál er um Mads Boe Mikkelsen.

Dysturin á Svangaskarði byrjar kl. 18.30. Dómari verður Bjarki Danielsen.