Printz Board hevur í yvir tvey áratíggju verið ein týðandi leikari í altjóða tónleikaídnaðinum. Hann er serliga kendur fyri sítt arbeiði við Black Eyed Peas, har hann hevur verið við at skriva og framleitt fleiri av teirra kendastu løgum, m.a. “Where Is the Love?”, “Boom Boom Pow” og “Meet Me Halfway”. Umframt hetta hevur hann eisini samstarvað við nøvn sum Justin Timberlake, Fergie, CeeLo Green og Mark Ronson.

Við The Butter Funk Family bjóðar Printz Board eina orkufulla og improviseraða framførslu við røtum í funk, soul og groove. Konsertin í OY verður tann fyrsta av sínum slag í Føroyum, og sambært Printz sjálvum hevur hann longu fingið góðan tokka fyri landið.

“Eg elski at vera her,” sigur hann. “Tá eg steig á land, merkti eg beinanvegin eina heilt serliga orku. Eg elski seyðin, byggilistina, flaðtekirnar, fossarnar – og eg elski matin!”

Og sambondini til Føroyar eru longu til staðar. Mikael Blak, Per Ingvaldi Højgaard Petersen og Rógvi á Rógvu – tríggir av mest virknu og royndu tónleikarunum í Føroyum – fara allir at spæla saman við Printz leygarkvøldið. Teir kenna hann frá einari turné við Eivør í Los Angeles, og tónleikaligt vinalag uppstóð beinanvegin. Nú hittast teir aftur til eitt kvøld merkt av funki, improvisatión og livandi spæligleði.

Konsertin verður hildin í OY, ið seinastu árini hevur ment seg til ein av høvuðspallunum fyri livandi tónleik í Tórshavn.