Hóast FM er nógv størsti heiðurin í fótbóltsárinum, so er finalan um løfmanssteypið ofta størsti einstaki dagurin. Hesi síðstu árini hevur eisini nógv staðið uppá spæl, tí vinnarin av kappingini um løgmanssteypið í 2023 og 2024 byrjar í 2. umfari í Conference League árið eftir. Enn ber ikki til at siga tað við vissu, men sannlíkt er, at steypavinnarin í 2025 eisini byrjar í 2. umfari í Conference League í 2026.

KÍ trívist illa í steypakappingini

KÍ trívist illa í steypakappingini óansæð um vit fara aftur í tíðina ella tosa um síðstu árini. KÍ hevur bara seks ferðir vunnið steypakappingina, sum er sama tal sum Víkingur, sum er stovnað í 2008. Søguliga sæð var ein frágreiðing, at KÍ ikki luttók í átta steypakappingum av teimum 15 FM-árunum hjá KÍ fram til 1970.

Síðstu árini hevur KÍ havt tað sera torført í steypakappingini. Samanbera vit við hini topp 5 liðini, so hava liðini síðani til og við 2017 verið umboðað í finaluni:

5 ferð: HB

4 ferð: B36

3 ferð: Víkingur

2 ferð: NSÍ

1 ferð: KÍ

2017: Hálvfinalu

2018: Útslignir fyrsta umfar

2019: Hálvfinalu

2020: Útslignir fyrsta umfar

2021: Útslignir fyrsta umfar

2022: Finalu

2023: Útslignir fyrsta umfar

2024: Útslignir fyrsta umfar

Sostatt síggja vit, at hóast KÍ síðstu fimm árini er endað í topp 3, so hevur liðið bara einaferð hesi árini verið millum átta tey síðstu liðini í steypakappingini. Og tað árið, í 2022, møtti KÍ ongum topp 5 liði áveg í finaluna. Mótstøðuliðini vóru Skála, ÍF og 07 Vestur. Síðani KÍ vann kappingina um løgmanssteypið í 2016 hevur KÍ bara einaferð vunnið á einum topp 5 liði í kappingini. Tað var í fjórðingsfinaluni í 2019 móti B36, tá KÍ vann eftir longda leiktíð.

Mánakvøldið kl. 18.30 møtast HB-KÍ í Gundadali í fyrsta umfari í kappingini um løgmanssteypið 2025. Vinnarin fær heimavøll móti vinnaranum av 07 Vestur-B36 í fjórðingsfinaluni.