Sexchikana og sexisma skulu ONGANTÍÐ góðtakast! ØLL – eisini gentur og kvinnur – skulu vera trygg í okkara samfelagi. ØLL– eisini gentur og kvinnur – skulu trygt kunna fara á útbúgvingarstovnar, arbeiðspláss, frítíðaríttriv, ítrótt, býarlív, náttarlív o.s.fr. uttan at óttast sexchikanu ella sexismu. Vit, kvinnufeløg í Føroyum, taka staðiliga frástøðu frá sexchikanu og sexismu.

Sexisma er eitt útbreitt fyribrigdi um alt landið og á nógvum arbeiðsplássum. Sexisma stingur djúpt í samfelagnum, og er við til at skapa gróðrarbotnin fyri mismuni og chikanu, herundir eisini seksuellari chikanu. Grundleggjandi, er hetta tekin um manglandi virðing fyri samtykki og byggir eisini á sexistiskar ímyndir um at menn hava “rætt til” kvinnukroppin.

Tað er sera týdningarmikið, at tey, sum uppliva sexchikanu á arbeiðsplássinum og aðrastaðni kunnu boða frá hesum á ein tryggan hátt.  Harnæst er týdningarmikið, at málini hjá teimum, verða viðgjørd á rættan hátt.

Vit mæla til, at landsstýrisfólkini í javnstøðumálum og arbeiðsmarknaðarmálum beinanvegin taka stig til at gera eina kanning, sum lýsir, hvussu umfatandi sexchikana og sexisma eru í Føroyum. Henda vitan er týdningarmikil at hava við í arbeiðinum at gera nakað munadygt við at basa sexismu og sexchikanu og harvið basa teimum trupulleikum, sum standast av hesum í Føroyum.

Tað er eitt framstig, at kynsligur ágangur verður nevndur í uppskotinum til kunngerð um sálarligt umhvørvi. Men hetta er als ikki nokk. Tørvur er á, at tað verður ásett í lóg, at seksuel chikana er ólóglig.

Vit mæla til:

• At tað verður ásett í lóg, at seksuel chikana á arbeiðsplássum er ólóglig.
• At tað verður ásett í lóg, at arbeiðsgevarar – bæði almennir og privatir – skulu gera reglur um, hvussu mál um sexchikanu á arbeiðsplássinum skulu handfarast.
• At ein kanning verður gjørd, sum lýsir, hvussu umfatandi sexchikana og sexisma eru í Føroyum

Kvinnufelagið í Havn, Kongshavnar kvinnufelag og Sørvágs kvinnufelag