Bónuskappingin – finala, menn: 
Mjølnir – Fleyr 3-2 (25-17, 25-18, 15-25, 23-25, 15-6)
 
Í síni sjeyndu steypafinalu á rað vann Mjølnir við 3-2 sigri á Fleyr sína áttandu steypafinalu tilsamans og sína fimtu greipu síðan 2019. Men tað var ikki uttan svørðsslag í dag, tí hóast Mjølnir uttan himpr vann tey bæði fyrstu settini, kom Fleyr afturíaftur og javnaði til 2-2. Í javnbrótaranum var Mjølnir kortini eirindaleyst og vann 15-6.
Men lítið bendi tó á, at dysturin fór at gerast so spennandi, tá Mjølnir lættliga hevði vunnið fyrsta og annað sett ávikavist 25-17 og 25-18.

Men Fleyr var sum hamskift í triðja setti og legði seg á odda 7-1 og 12-4 og læt ongantíð Mjølnir fáa samband aftur, og so vann Fleyr 25-15.

Eftir at Mjølnir hevði lagt seg á odda 5-0 í fjórða setti, helt onkur kanska, at triðja settið bara hevði verið tað typiska, sum tapandi liðið sleppur at vinna, men viðkomandi fór skeivur, tí Fleyr svaraði aftur og javnaði til 19-19 og vann settið 25-23.

Mjølnir fótaði sær tó aftur, og legði seg á odda 6-2 í javnbrótaranum, og skjótt sást, hvønn veg tað bar. Munurin vaks upp í 9-3 og 14-4, og við 10 dystarbóltum fór tað ikki at ganga galið hjá Mjølni, sum at enda vann 15-6.
Við sigrinum hevur Mjølnir nú vunnið steypakappingina átta ferðir, sum er ein færri enn tær níggju ferðirnar hjá ÍF, og ein fleiri enn tær sjey ferðirnar hjá SÍ. Einasta steypafinalan Fleyr hevur vunnið, var í 2017. SÍ b hevur eisini vunnið eina ferð.