Myndir frá kvøldskúlaframsýningini
Í góðveðrinum í dag nýttu mong fólk høvi at vitja framsýningina hjá Kvøldskúlanum og Handarbeðisskúlanum. Vár var í luftini, og lagið var gott á fólki. Eisini vóru mong avbygdafólk ímillum gestirnar. Nógv vakurt var at síggja fyri eyga og góðir tónar vóru eisini til oyruni, og ein frálík Café, so okkurt leskiligt var til góman eisini.
Tað var ein rørandi løta, tá ið Jutta fekk nøkur góð orð og tøkk frá Varaborgarstjóranum og Kvøldsúkleiðaranum, nú hon hevur valt at leggja frá sær eftir at hava undirvíst í 60 ár uttan steðg og entá uttan nakran sjúkradag. Tað er helst eindømi um trúfesti.
Seinastu tvey árini hevur Jutta havt ein dugnaligan undirvísara, Marthu Justesen, afturat sær. So nú er stafettin latin víðari til Marthu. Jutta var sera fegin um dagin og heiðurin.
Alt í alt ein sera hugnaligur dagur, har mong nýttu høvi til at síggja tað vakra og prátið gekk lystiliga millum tey vitjandi.