“Virksemið hjá samtakinum royndist væl í fyrsta ársfjórðingi, og tað sæst m.a. aftur í hækkandi innlánum, útlánum, realkredittlánum og einum góðum tryggingarúrsliti hjá dótturfelagnum Trygd. Bæði privatkundar og vinnukundar megna at halda sínar lánsskyldur, og vit hava bert staðfest fá fíggjarlig tap higartil í ár. Lækkandi rentustøðið gagnar kundum, ið hava lán í bankanum, og samstundis ber til at fáa eina lutfalsliga góða rentu fyri pengar, ið standa á samansparingarkontu. Útlitini fyri restina av árinum eru sum heild góð, men tað skerst ikki burtur, at økta geopolitiska óvissan og vandin fyri herdum handilskríggi kunnu fáa ávirkan á okkara kundar og okkum sum fíggjarstovn,” sigur Turið F. Arge, forstjóri í Føroya Banka.

Leiðslan í bankanum væntar, at nettoúrslitið fyri 2025 verður millum 210 og 240 mió. kr, ið er nakað lægri enn í 2024.

Spara saman við góðari rentu

Hóast rentan er lækkað í fleiri umførum seinasta árið, so hvørt sum inflatiónin er minkað, ber framvegis til hjá kundunum at fáa eina lutfalsliga góða rentu fyri pengar, ið standa á samansparingarkontu ella hárentukontu í Føroya Banka. Hetta sæst aftur í innlánunum, ið eru hækkað við 3 prosentum samanborið við 4. ársfjórðing í 2024 og við 15 prosentum samanborið við 1. ársfjórðing í 2024.

Tað er eisini vorðið munandi lættari at byrja at spara saman, síðani bankin í desember lat upp fyri møguleikanum hjá kundum at stovna egnar samansparingarkontur í netbankanum. Kundarnir hava tikið væl ímóti hesum møguleika, tí nógvar hundrað kontur eru longu stovnaðar á henda hátt. Tað ber til at velja millum ymisk sløg av samansparingarkontum til ymisk endamál.

Fyrsti kjattbottur av sínum slagi í Føroyum

Føroya Banki leggur seg støðugt eftir at menna sínar talgildu pallar fyri at gera tað lættari hjá kundum at fáa yvirlit yvir síni fíggjarviðurskifti. Í hesum sambandi fingu kundar í bankanum í apríl ein kjattbott í netbankan og á heimasíðuna, ið bæði skilir og skrivar føroyskt. Talan er um fyrsta kjattbottin av sínum slagi, sum er mentur av starvsfólkum í bankanum og við góðari hjálp frá máltøknideplum í Føroyum og Íslandi. Endamálið við hesum amboði er at gera tað lættari hjá kundum at fáa skjót svar og vitan um alskyns fíggjarviðurskifti – eisini uttan fyri vanliga upplatingartíð. Tølini hjá bankanum vísa, at nýggi kjattbotturin verður nógv brúktur av kundum hvønn dag.

Roknskapurin í stuttum

• Úrslitið fyri skatt gjørdist 75 mió. kr.
• Rakstrarúrslitið fyri niðurskrivingar gjørdist 56 mió. kr.
• Útlánini vóru 9,3 mia. kr.
• Realkredittlánini vóru 2,9 mia. kr.
• Innlánini vóru 10,3 mia. kr.