Norðlýsið vendi sær til formaninn í Bláu Bylgju, ið eisini var á staðnum, og hann sigur soleiðis:

- Alt var fínt, og eftir dystin byrjaðu vit at rudda upp eftir okkum í skýlinum og kring vøllin. Vit tosaðu eisini við fleiri NSÍ fjepparar, og alt var gjørt í góðum anda.

- Sjálvur haldi eg, at tað er stuttligt og hugaligt, at so nógvir áskoðarar eru til dyst, og stemningurin var eisini sera góður. Men meðan vit rudda av, var onkur NSÍ fjeppari farin avstað við fleiri fløggum og útgerð, sum Bláa Bylgja eigur. Hesir fáu fjepparar, vildu ikki lata fløggini aftur, og ein av ungu NSÍ fjepparunum slerdi ein kvinnuligan KÍ fjeppara við síðuna av høkuni.

Bláa Bylgja hevur fingið umbering frá onkrum av teimum, ið vóru á staðnum, men enn er umbering ikki komin frá øllum teimum persónum, ið gjørdu órógvið.

Stadionspeakarin upplýsti í gjár, at tað vóru uml. 1.200 gjaldandi áskoðarar til dystin, og Bláa Bylgja leggur dent á, at tað bert vóru nakrir heilt fáir, ið stóðu aftanfyri hetta, meðan øll hini róptu og hugnaðu sær í røttum ítróttaranda.