Farna umfar í bestu deildini hilnaðist væl fyri KÍ, har liðið vann sannførandi 0-5 á TB í vánaliga veðrinum í Suðuroy. Harafturat setti NSÍ stig til, tá ið HB knógvaðu runavíkingum á heimavølli.

Í løtuni eru 4 stig á muni millum KÍ og NSÍ, sum í løtuni kappast um ovasta plássið í deildini.

Tí verður tað eisini ein sera spennandi dystur á Norðoyastevnu, sum Bláa Bylgja ætlar at seta dám á.

- Vit hava sett okkum fyri, at verða meiri sjónlig og skapa ein stemning, sum merkist. Vit vóru við í regninum í Suðuroy, og trummaðu og róptu tað vit kundu, fyri at stuðla okkara leikarum á vøllinum.

- Dysturin leygardagin skal vinnast, og tí vilja vit eisini geva øllum KÍ-fjepparum møguleikan at møtast longu kl. 17.00 í Varpinum, har møguleiki verður at fáa okkurt gott at drekka og okkurt lítið afturvið. Tað hevði verið cool, um vit fingu málað Djúpumýru blátt í samband við dystin móti NSÍ, sum má metast at vera ein tann týdningarmikilasti dysturin higartil í ár, sigur Høgni Louisson Poulsen, formaður í Bláu Bylgju.

Tiltakið í Varpinum byrjar kl. 17.00 og dysturin á Djúpumýru byrjar kl. 19.00.