Tilsamans fær samgongan einans 36,6% av atkvøðunum í veljarakanningini. Javnaðarflokkurin fær 14,5% og 5 tingfólk, Tjóðveldi 14,8% og somuleiðis 5 tingfólk, meðan Framsókn fær 7,3% og 2 tingfólk. Afturgongdin er sostatt heili 6 tingfólk – Javnaðarflokkurin missir 4 og hinir báðir 1 í part.

Stóru andstøðuflokkarnir hava framgongd; her er framgongdin hjá Fólkaflokkinum tó nógv størri enn tann hjá Sambandsflokkinum. Fólkaflokkurin fær 34% av atkvøðunum og 3. hvønn tinglim, nevniliga 11. Tað eru 5 fleiri enn í dag. Sambandsflokkurin fær 22,2% og 8 tingfólk, ið er 1 meira enn í dag. Miðflokkurin gongur hinvegin aftur; hann fer úr 6,6% niður í 5,9%, men varðveitir kortini tingmannatalið upp á 2 tingfólk.

Sostatt fær sitandi samgonga 12 tingfólk og andstøðan 21 tingfólk í kanningini. Sjálvstýri, sum ikki er umboðað á tingi, fær einans 1,2% í kanningini, og er tað alt ov lítið til nakað tingfólk. Til seinasta val fekk Sjálvstýri 2,7%, ið heldur ikki var nóg mikið til at koma á ting.

Meir verður at frætta frá veljarakanningini seinni.

Kelda: Kanningin hjá Portalinum